وهم الشهرة



في الحقيقة وبصراحة . انا جاي احكي عن حاجة بعملها بشكل دايم ومستمر . ممكن تكون الحاجة دي مرض . ممكن تكون وهم . ممكن برضة تكون جنون . ودا كله انا بقر وبعترف بيه .

اساسا واصلا المدونة اسمها نوتة مجنون . والجنون بالنسبالي مجرد وصف استحقة .
لقب احيانا كتيرة بيسعدني . والجنون ياما اتكلمت عنه وقولت رؤيتي ونظرتي فية . واننا كلنا مجانين بس بنسب مختلفة ومتفاوتة . وان العاقل بالنسبة للمجنون مجنون برضة ما فيش فرق ولا اختلاف في المعنى ولا المفهوم .

الاقيني فجأة أروح على الجوجل وأكتب ( الشرقاوي ) ظنا مني اني سأجد اسمي لامعا في بعض المواقع . او ان بعض الصحف اكتشفتني او اكتشفت بعضا مما عندي حتى لو كان جنونا .
ببقى فاكر انه ممكن يكون حد ما اعرفوش عرفني . ببقى فاكر حاجات كتير . لعند ما بتيجي النتيجة ( نتيجة البحث ) ان فيه ملايين اسمهم الشرقاوي . ممثلين وكتاب وسياسيين ومدونين اخرين .
ويارتني بأرضى بالأمر الواقع وأسكت وأعرف الحقيقة المرة . وهوا ان ما حدش يعرفني واني لا وجود لي في هذا العالم الواسع الشاسع . المليء بالملايين من الشرقاوي الأكثر شهرة ونجاحا مني .

فبروح أغير الإسم وأكتب ( محمد الشرقاوي ) على أساس إني بالطريقة دي بـ اقلص نطاق البحث وبخلية مقتصر على إسمي . بس دا غباء مني أو انه استغباء . بحاول اني اضحك على نفسي واخدعها بطريقة أو بأخرى . بل اني بكون باخدعها فعلا بطريقة وأخرى . فكلما خرجنا من خدعة واكتشفنا حقيقتها أذهب إلى خدعة اخرى لأطبقها وأنفذها لأصدقها . نخرج من حفرة لنقع في دحديرة . وكل ما نطلع من الدحديرة بنقع في الحفرة . بس مش غصب عننا . دا بمزاجنا .
والاقي برضة انه ما فيش فايدة . يا ابني انت مين في وسط ملايين الملايين ؟
وكـ إن الاجابة يا ابني ريح نفسك . وبطل بحث والوهم اللي انت عايش فيه . وخليك في المكان بتاعك اللي  مش هتخرج منه . وكفاية عليك اللي عرفوك . مش احسن من لو كانوا هما كمان ....... في الوقت ده انا بقاطع الكلام اللي بحس انه بيدمرني داخليا بطريقة غير آدمية . وبقول لأ . ازاي اني ما ابقاش موجود . يعني اية اجي واروح وماحدش يحس بيا . اكيد فية طريقة . اكيد فيه حد عارفني . او حتى سمع عني . مش ممكن كل المحاولات المريرة دي للوصول وبرضة ما اوصلش . ومش ممكن كل الأحلام دي تموت في لحظة يأس . ازاي خيالي اللي الملون يتحول لسواد وظلام دامس . وازاي صوتي يبقى أخرس . ورؤيتي تبقى عامية .  ( وافتكر احمد عبدالعزيز – عباس الضو بيقول لأ – التاريخ بيقول لأ ) .
هم يضحك وهم يبكي . واهو كله هم .

اروح اغير الاسم واخلية يقتصر على اسم ايميلي . وساعتها اطمن شوية . عشان بلاقيني فعلا موجود .
نفسي : يخرب بيت الجنون . مااهو ايميلك يا ابني . ما هو لازم يبقى موجود .
انا : ايوة عارف . بس الاهم انه موجود . ومعناه ان انا ليا وجود .
نفسي : انت بتخرج من نطاق الجنون عشان تدخل في نطاق الغباء .
انا : مش مشكلة الاهم اني لاقت اني موجود .
نفسي : دا انت مش عايز تسمع ولا حتى تفهم .
انا : لأ بالعكس انا فاهم وهارش اوي . بس انتي اللي مش واخدة بالك . وهقولك بس حاولي ان انتي اللي تفهمي . صحيح ايميلي لازم يبقى موجود عشان انا اللي عاملة ودا لو فهمتيها بالمعنى الحقيقي هتعرفي المغزى .
نفسي : مغزى . قول يا فالح قول . قول يا فلحوص .
انا : ان اللي عايز يكون لية مكان ووجود . لازم يعملة بنفسة .
نفسي : انت محتال . وبتتحايل عليا . وبتتلاعب بالكلمات . فلسفة فارغة .
انا : عمرها ما كانت فارغة . الا لو كنتي انتي فارغة .
وبعدين اسكتي بقى دلوقتي . عايز اكمل كلامي .

بعدها بغير الاسم واخليه عبارة عن عنوان مدونتي . ( شخابيط شرقاوي . نوتة مجنون ) والاقيني موجود .
في كتير مواضيع وشخابيط . وصور . واكتفي بكدا . واقول دا كدا تمام اوي . على الاقل موجود .
واعمل نفسي حد تاني مش انا . وادخل على المواضيع واقراها من الاول وجديد . وياسلام لما الاقي فية رد ولا ردين . ولا لما اشوف الناس الحلوة اللي رافعة معنوياتي . قلبي يرقص . يضحك . يغني ويصقف .

نفسي : بتصقف على خيبتك . بتصقف على اية ؟
انا : هوا انا كل ما اجي افرح . تنكدي عليا . انتي اية ؟ انا حاسك مش نفسي ونفس حد تاني
نفسي : انا بس بقولك الحقيقة اللي انت مش عايز تعرفها ولا تشوفها . وبعرفك ان انا فاهمة ان كل اللي بتعملة دا محاولة للهروب ومراوغة مش هتنجح .
وبعدين الواحد عشان ينجح يبص للاقل ولا يشوف الاعلى والانجح ؟ غريب انت لما تفضل عايش في وهم وكدبة كدبتها على نفسك وعايز تصدقها وتفضل مصدقها .
انا : طب دا يتسمى اية ؟
نفسي : دا ( وهم الشهره ) .

تعليقات

  1. "بحاول اني اضحك على نفسي واخدعها بطريقة أو بأخرى . بل اني بكون باخدعها فعلا بطريقة وأخرى"
    :))
    السطرين دول بجد والله العظيم خللوني وقفت وصقفت لك :))
    استمر يا كبيــر
    وافر تحياتي وعميق احترامي وتقديري
    "بعد إذنك تلغي التحقق من الكلمات"

    ردحذف
  2. كنت واقعة فى نفس الحفرة .. وكل شوية بظبط نفسى بتسلل ، بس برجع وأقول أن فعلاً الشهرة دى مش بس وهم .. لكن فخ كبييييييييييير بيشوه صاحبه ويضحك عليه الخلق ..

    حفظنا الله وإياكم :)

    ردحذف
  3. هههههههههههههههههه انا كدة بردة هههههههههههههههه
    الحمد الله ماطلعتش لوحدة مجنونة طلع فى غيرى مش انا لوحدى اللى مجنونة
    بس تقريبا كلنا عندنا حب للشهرة ولو على خفيف
    اشكر باه الصدفة اللى دخلتنى على المدونة واللى شهرتك شوية صغيرين :)

    ردحذف
  4. كان عندنا في ثانوي أستاذ محمد الشرقاوي ^_^ مدرس عربي .
    طبيعي اننا بنحب أنفسنا وبنغالي في حبها,عن نفسي لما أوصل لشهورة معينة حتي لو إلكترونية بنسحب ^_^ وبرجع للصفر حتي أصحابي بيعتبروا ان دا جنان ,بس انا بمل اووي
    وبحب ابدأ من جديد حتي لو الجديد هيخسرني حاجات كثيرة !!
    حركة جوجل دي تقريبا عملتها ,بس كنت عايزة اعرف مين اللي بيحمل اسمي في محافظتي ,اكتشفت ان فيه 2 غيري بجد زعلت اووي ..!!
    انا ساعات بقعد أفكر ,في موضوع أني ليه مكنش آثر مش شهر لا .,,أثر,أكثر من الشهرة ,لان اللي بيتشهر هيجي يوم بريق شهرته يموت,ام الآثر يظل ويستمر

    ردحذف
  5. تصدق يا P A S H A يا غالي . اني انا كمان لما لاقيت تعليقك وشوفت ردك وكلماتك . صقفت لنفسي تاني . صقفت لنفسي لما اخلي حد برنس زيك يصقفلي . دا انا واد جامد بقى وشاطر وكدة .
    بجد رفعت معنوياتي . خصوصا انك من اصحاب فلسفة خاصة من ناحية المجانين وانهم بالتأكيد هيجي يوم ويبقوا في المقدمة ، دة كمان وشعارك ( المجانين تنتظرهم المقدمة ) . وتعرف اني ما بكونش متوقع ان حكاويا وشخابيطي تعجب حد . خصوصا لو كان الموضوع عن شيء مجنون بعملة . او بتكلم عن نفسي ولنفسي في نفسي . بحس ان اي حد ممكن يقول . طب واحنا مالنا .
    مع اني بكون بكتبة وقاصد بيه حاجة تانية خالص . وبكون في نص الكلام رامي كلام لو اتفهم لوحدة ربما كان كافي .
    وحكاية اني استمر . فمش ممكن بعد دعمك وردك دا ما استمرش . حتى لو كانت محاولات بعضها يفشل بعضها في طريقة للنجاح . وانت الكبير صدقني .
    وكبير ليا كمان تواجدك وردك .
    واما عن "بعد إذنك تلغي التحقق من الكلمات" فمش بعد اذني . دا انا بشكرك انك تنبهني لشيء يكون فات عني . وتم بالفعل .
    لك انت اقدم كلماتك لعظمتها وروعة اسلوبها ووصفها . وافر تحياتي وعميق احترامي وتقديري .
    تشكراتي وتقبل تحياتي .
    اتمنى ان تعيد الزيارة . يسعدني تواجدك ودوام التواصل .

    ردحذف
  6. candy اشكرك جدا على ردك . على تواجدك اللي اسعدني . على اضافتك ووصفك البسيط العميق الرائع .
    الشهرة ان لم تكن وهما فهي فخ في حفرة كبيرة . او كالرمال المتحركة التي اذا صادت فريستها اخذت تجره وتجره الى ان تكبس على نفسة وتغرقة ، تقتلة .
    ربما قتلتة هما لا غرقا .
    اقتباس ( لكن فخ كبييييييييييير بيشوه صاحبه ويضحك عليه الخلق ) اعجبني وصفك . وانه عندما يقع شخص ما في ذلك الفخ . يصاب بتشوهات جعلتة ربما مسخا يضحك عليه الخلق .
    حفظنا الله وإياكم . أمين يارب .
    تحياتي وتشكراتي . اتمنى ان تعيدي الزيارة . كما انه يسعدني تواجدك وتواصلك الدائم .

    ردحذف
  7. حبات التوت - في البداية وهي ليست البداية . ولكن كيف لي ان اشكرك على ردك قبل ان ابدي اعجابي بالاسم المختار لمدونتك ( احاسيس بطعم التوت ) وياله من طعم مميز . ربما تاه عن الجميع . ربما لا يتذوقة البعض . ربما كان لمذاقة اشكالا وانواعا تختلف باختلاف الحبات وعددها . يختلف حتى في طريقة احتسائة . المعنى عميق يحتاج الى ان نتذوقه بكل تفاصيلة . فاقدم تقديري لك على الاسم المختار .

    اعجبتني الابتسامة حتى لو كانت مجرد حروف ( هههههههه ) ولكنها رسمتها على شفتاي تماما عندما وجدت بأني باستطاعتي ان ارسمها على وجه غيري .
    ومين قالك ان المجانين شوية صغيرين . دا احنا كتير اوي . وما فيش اكتر من المجانين . وعلى رأي صديقي P A S H A المجانين تنتظرهم المقدمة . هذا يعني بأننا كر ولكن ربما يتجاهلنا البعض . ربما لا يرانا البعض . لا يكتر بنا الأخرين . ولكننا نبقى موجودين .
    والسبب في ظننا اننا قليلين اننا لبعضنا غير معروفين . ومن موضعي هذا . وبتلك المناسبة اقترح ان يتم عمل حزب او مجتمع صغير ( مجتمع بمعناه العام - ربما مجتمع في مدونة ) يجمع كل من يصف نفسة بالجنون .
    منه تناقشنا في جنوننا . وطريقة تفكيرنا .
    وتعارفنا فيه على بعضنا وعرفنا مقدارنا .
    اقتباس ( بس تقريبا كلنا عندنا حب للشهرة ولو على خفيف ) دا حقيقي . وحقيقة ان كنا صادقين مع انفسنا لوجدناها ظاهرة تماما امام عيوننا . شهرة ولو على خفيف ..
    اقتباس ( اشكر باه الصدفة اللى دخلتنى على المدونة واللى شهرتك شوية صغيرين :) ) فعلا انا شكرتها وبشكر الصدفة وهفضل اشكرها . لان ليها نصيب كبير في حياتي . فياما لعبت الصدفة وعملت عمايلها معايا . الصدفة اساسا هي من جعلتني افكر في عمل مدونة . وكتير كتير من الصدف اللي ليس لها اول من اخر ولا حصر لها . ولكن ولكي يكون الكلام محدد . فانا بالتحديد وفي موضوعي هذا اشكر صدفة تواجدك ومرورك وردك اللي ابسطني واسعدني جدا .
    واتمنى ان تعيدي الزيارة . وتنيري كلماتي باضافاتك وردك .
    تشكراتي وتقبلي تحياتي .

    ردحذف
  8. عزيزتي - ياسمين - تعرفي انك ليكي وقفة . ولازم تتقال . صدقا صدقا يعني مش اي كلام . فالحق لازم يرجع لصاحب الحق . ووصف النجاح لا يستحقة الا الناجح . وصاحب الفضل لابد وان نشكره ونعطية قدرة . وهذا ان كان فانتي من تستحقية . وها انا سأوضح المقصود .

    انتي وعندما بدأتي في عمل مدونتك ( حروف منهكة ) وبعيدا عن مدى جمال المعنى . وبعيدا عن جمال كلماتك ومواضيعك . التي لا تحتاج الى تكرارها فهي حقيقة ثابتة ، واقعة وملموسة . كان النجاح هو الطريق الذي تستحقية . فاذا بي اجدك موجودة مضيفة ردا . اجدك موجودة من بين ( المتابعين : رافعين معنوياتي ). وابدأ في تتبعك . وتتبع طريقتك في الوصول . طريقتك في الكتابة . واذا بكي بالفعل مجتهدة . في اليوم ربما كان اكثر من الخمسة مواضيعك وكتابات . وتدويناتك صغيرة كانت او كبيرة ليس هو المهم . المهم انك موجودة . بين رد على هذا او ذاك . او وصفك لهذة او تلك .
    واذا بك تضيفي الاثر الذي اشرتي اليه اعلاه . فمن يتابعونك اصبحوا في تزايد ( خمسة وخميسة عليا - اللهم لا حسد ) . هذا لم يكن من فراغ . بل لانك اردتي فكنتي .
    ومن هنا بدأت أنا . في المحاولة الجادة . في أن أضيف اثرا ما . في مكان ما . وبدأت في التجول بين تلك المدونات الرائعة . وهؤلاء الاناس الجمال . محاولا أن أضيف ردي ووصفي . ( فكيف لي ان اطلب سعادة أنا لا اقدمها للأخرين ) . وبطريقة او بأخرى فأنا أجعلة يعرفني . ويعرف كم جميلا ان يعرفة الأخرين .
    لم ينتهي الموضوع عن هذا الحد . فانتي كنتي من المداومين على التواصل والاهتمام بالتواجد وهذا ما جعلني اظن بأنه لا يجب التوقف عند هذا الحد . وانه لابد من وجود جديد . واخذت في التفكير في مواضيع للكتابة .
    ففي عقلي الكثير ولكنها تحتاج الى من ينعشها .
    اقتباس ( انا ساعات بقعد أفكر ,في موضوع أني ليه مكنش آثر مش شهرة لا .,,أثر,أكثر من الشهرة ,لان اللي بيتشهر هيجي يوم بريق شهرته يموت,ام الآثر يظل ويستمر ) كلام سليم .صحيح مية المية . لابد وان نحاول ان نكون اثرا . لا يمحوه الزمان . ولا تمحوه تضاريس المكان . اثرا مشهورا ايضا يعرفة كل من كان . فكيف لاثر ان يكون ذا فائدة اذا لم يكتشفة احد ما .
    تحياتي وتشكراتي . دوام تواصلك يسعدني .

    ردحذف

إرسال تعليق

رافعين معنوياتي . رأيك يهمني . ردك يسعدني .

المشاركات الشائعة من هذه المدونة

الحلم الأزرق

ملعون أبوها الحمامة أم غصن زتون ..

الشيطان يحكم ..