الحلم الأزرق

لية ما نغيرش طريقة تفكيرنا ونظرتنا شوية للأمور .

يعني نشوف مشاكلنا ببساطة شديدة . ونبدأ نعرفها ونكتبها . بعدها نيجي لمرحلة ازاي نحلها .

وبالطريقة دي هنعرف الحلول اللي بيها نقدر نحل المشكلة . وبالتأكيد هيكون متاح أكتر من حل .

وبكدا نقدر اننا نختار الحل المناسب واللي هوا أفضل الحلول .

نفسي بتقولي : طب دخل دا اية في الكلام اللي انتا جاي تقولة النهارة يا شرقاوي .

بقول لنفسي : صراحة مش عارف . بس اهي بداية .

وعلى ما نيجي نوصل للنهاية جايز نعرف يعني اية ولية قولناها .

من فترة كدا قابلتني حلقة من مسلسل تركي . وأنا مش من متابعين المسلسلات التركية زي كتير من الناس . ولا المسلسلات بشكل عام . غير اني بتابع الانمي زي ناروتو أو ون بيس وفي طريقي لمتابعة بليتش وكونان والقناص ودا وما بيبقاش عندي أي مشكلة في اني اتابع الكتير من هذا النوع .

ولكن المسلسلات التركية كرهتها من غير ما اتابعها ودا عشان الهوس اللي حصل في العرب بيها . وعشان قد اية بقت مسيطرة على تفكيرنا وقلوبنا . على أرواحنا وعقولنا .

ودا بقى غير الحوادث اللي حصلت بسبب تلك المسلسلات . طلاق ، قتل ، انتحار . وكتير من الأشياء التي لم نكن يوما نتوقع حدوثها جراء مشاهدة مسلسل ما .

الاتراك فرضوا سيطرتهم علينا في كل شيء . بداية من المسلسلات وطريقة اللبس والحجاب حتى في السياسة ، وكيفية ادارة البلاد . باتت هي مثلنا الأعلى في تقييمنا للأشياء .

ولا أنكر أني من عشاق تلك البلد . تركيا . بكل ما فيها من جمال طبيعة ونجاح اقتصادي وسياسي . ولا أنكر اني من عشاق ذاك الجمال الانثوي الطبيعي الذي تتميز به التركيات عن غيرهم .

ولكن . لا يعني عشقي بهم أني اكون ذاك المساق خلفهم . دائما .

على القليل أكون كمن يتبع استاذة ليتعلم منه ويعرفة .

نفسي بتقولي : المهم يا شرقاوي . ما طولش اكتر من كدا . لانك بعدت خالص عن اللي جايين نتكلم عليه النهاردة . فسيبك بقى من المقدمات الطويلة . والعادة اللي فيك ومش عارف تبطلها دي .يا عم لو فضلت كدا ما حدش هيقرالك كلمة . ولا حرف حتى . حاول تنجز .

بقول لنفسي : حاضر بس المقدمات دي بتبقى مهمة برضة . هيا لوحدها أصلا موضوع .

نفسي بتقولي تاني : أيوة يا عم عارفين . بس فية ناس ما بتحبش كدا . ولازم تحترم الذوق العام .خليك واعي بقى . والا هتفضل تكتب وتعيد وتزيد . ولا حدش يعبرك .

المهم يا جدعان . ان المسلسل دا خلاني اغير تفكيري بالكامل في المسلسلات التركية .

وأعرف قد اية هما فعلا جمال . قد اية يستاهلوا ان أي حد يتابعهم حد الادمان .

وانهم فرضوا نفسهم بذكائهم وقلبهم . بتفكريهم وعقلهم .

المسلسل بيكون مكتوب بدرجة فوق الممتازة . ما بيقتصرش على 30 حلقة زينا احنا المصريين .

اللي مظبطين نفسنا على عدد ايام الشهر . واللي لو حد فينا دخل شاف الأولى وراح شاف الاخيرة ما يحتاجش يشوف اللي في الوسط . يمكن لاننا فاشلين في ربط الاحدث اللي في الوسط بعضها ببعض مع ربطها بالاولى وعدم اكتمالها الا بالاخيرة . ( مش عارف صراحة . انا زي ما قولت مش من المتابعين والمهتمين بالمسلسلات ) . وان جمالهم فعلا نابع من داخلهم .

وكيفية التمثيل بالفعل شيء متقن تماما . حتى في الشخصيات الشريرة بتقدر تحس الشر فيهم . والخير تقدر تشوفه فيهم . والحب والرومانسية واللي هما مشهورين بيه ، بتلاقيها تلامس قلبك وعقلك . وتتمنى تكون زييهم .

ودا فعلا بقى اللي بنسمية الفن الهادف . انه يوصلك لدرجة من المثالية اللي تتمنى تكون زيها . ويوريك قد اية الموضوع سهل . ويعرفك الحلول . ويوريك الرومانسية بسيطة قد اية ويعرفك حتى ازاي تحب . بيوريك الشر والخير بدرجاتة وبجميع صوره واشكالة . ونهاية كل منهم .

نفسي بتقولي : شرقاوي . ( بتبرألي . وبتجز على اسنانها ، مشتعلة غيظا )

بقول لنفسي : اه ماشي افتكرت . معلش . 

المسلسل دا اسمة ( الحلم الأزرق ) وهوا بيدور طبعا حول الموضوع الاساسي اللي كل المسلسلات والافلام بتدور حوالية . وبتتكلم عنه وتحكية . الا وهو موضوع الصراع بين الخير والشر . ومع اختلاف الرؤى في ان مين اللي هينتصر في النهاية . فالبعض يحب ان تكون النهاية مختلفة بعض الشيء ليجعل الشر هو الفائز وهو من يضحك في النهاية . والكثير يجعل النهاية هي المعروفة لدينا جميعا ان الخير هو الفائز وهو صاحب الضحكة الأخيرة التي بها سيضحك كثيرا .

وفي المسلسل كان الاختلاف انه صورلك الشر على انه جن وعفاريت . ملابس سوداء . دماء . حقد وغل وكراهية .  التحكم والسيطرة والاستغلال . خطة شريرة للهيمنة على كل شيء .

وان الخير هما فاعلين الخير اللي بتكون الملايكة معاهم دايما . تحميهم من شرور اصحاب تلك القلوب .

والقصة بتبتدي توريك ان فية منظمة مجهولة بيترأسها دكتور أشرف ، عنده مشروع في دماغة انه عايز بنت معينة عشان فيها مواصفات محددة من خلالها يبتدي ينفذ مشروعة وخطتة في التحكم في العالم والسيطرة على كل شيء . اضافة الى فكرة الخلود . والمسلسل بيصورلك انه مثلا عايز يكون اله .

في الجانب الأخر في اختين هما زينب واختها ياسمين . اللي هما أطيب من بعض . وما فيش وحدة تتخير عن التانية . زينب بتشتغل استاذة عبقرية بعقلها وقلبها . وياسمين بتشتغل ممرضة مثالية واللي لقب ملاك الرحمة ما يلقش الا عليها .

الدكتور بيفضل يبحث على البنت المثالية . من خلال اعلانات وجمعية لتوظيف البنات . عن طريق اخذ عينات دم تحت اسم انه عشان اوراق التوظيف والى أخرة . وبتكون فية ممرضة بتساعدة في الموضوع دا . انها ترسل ليه بعض العينات التي تستطيع الحصول عليها . والمشكلة ان الممرضة دي بتكون صاحبة ياسمين . اللي بالطبع هتخون الصداقة تحت شهوة المال وهترسل العينة لاشرف اللي هيلاقيها هيا البنت اللي بيدور عليها من زمان .  

وطبعا توضيحا لفكرة الخلود . هوا انه المنظمة دي بتطلق على نفسها اسم السلالة الحاكمة . وانهم من خلال حصولهم على البنت اللي بيبحثوا عنها هيقدروا انهم يغيروا بعض الجينات عندها عشان تيجي بنتها وتكون بداية الخالدين . ومنها هيقدروا ياخدوا من جينتها ( بنتها ) يحقنوا بها نفسهم عشان هما كمان يكونوا خالدين . ومن خلودهم يكونوا هما اللي بيحكموا الجميع . وكأنهم هم الألهه وباقي البشر هم العبيد .

نفسي بتقولي : بقولك اية يا شرقاوي . انت شكلك كدة مش ناوي تجيبها لبر النهاردة .

والموضوع كدا شكلك مش ناوي تبتدية . ولا تتكلم فيه .

فقصر . ولم المتكسر . وقول للناس وعرفها . ان اللي كنت جاي عشان تقولة .

وبدأت في المقدمة اللي انتهت بموضوع جديد . ما قولتهوش .

بقول لنفسي واقولكم : فعلا انا في البداية كنت جاي عشان اقول شيء تاني خالص مرتبط بالمسلسل دا . لكن لاقيت نفسي وكعادتي بأطيل في المقدمة . اللي انتهت بهذة النتيجة . والموضوع القادم هيكون هوا اللي كان مخطط لية . هيكون بعنوان ( أستاذة تعاقب تلاميذها بمعاقبة تلاميذها لها )