لعبة الفراخ مش مجرد لعبة

الموضوع ببساطة هوا اني وانا بلعب لعبة الفراخ الشهيرة . شفت شيء ممكن اكون أول مرة أشوفة أو احسة . يمكن كتير شافوه قبلي . يمكن فية برضة ما شافش .
لعبة الفراخ واللي هيا عبارة عن انك بتقتل الفراخ عشان تاكلها . وشوية تلاقي فرخة معاها هدية تقتلها وتلاقي الهدية سلاح جديد . تبدا بيه تقتل تاني وتالت وهكذا . لعند ما بتنتهي المرحلة اللي انت فيها وتوصل للفرخة الكبيرة . واللي هتكون محتاجة منك مجهود اكبر واسلحة اكتر واقوى عشان تقدر انك تقتلها .
ببساطة هيا دي اللعبة .

بس اللي لاقيتة ان الصغير بيحمي الكبير ويضحي بحياتة عشان ما يمسش الكبير حاجة .
تلاقي الكتكوت يجي عليك بكل شجاعة وقوة وهيا عارف انه لو لمسك هوا كمان هيموت . بس مش مشكلة الاهم انك ما توصلش للأكبر منها .

الموضوع كمان بيتطور ان الفراخ بتدخل في الموضوع . الكتاكيت بتحمي الفراخ والفراخ بتحمي الأكبر .
الفرخة تقتلها تنزلك كتكوت . الكتكوت يفضل يناضل ويحاول لأخر لحظة في حياتة . الاهم انك ما توصلش . وان حياة امه الفرخة ما تروحش هدر .

بعد ما تخلص عليهم كلهم . تلاقي فرخة أكبر شوية . متصفحة . وبتحاربك لوحدها . بس باسلحتها اللي ممكن تكون مش موجودة مع الفراخ الاصغر او الكتاكيت . وكان افضلها لو خلت الاسلحة مع الفراخ الاصغر على اساس اني ما اوصلش لها . بس نقول اية ؟ اش جاب لجاب .

المهم بنفتكر ان الموضوع بيقف عند كدة . بس تلاقي انهم بيزدادوا وبتختلف خططهم . ونبدأ الضرب والحرب لعند ما بنقدر اننا نخلص عليهم ونصفيهم فرخة فرخة ، كتكوت كتكوت . بس يجيلنا طبق طاير . او انسان آلي . تلاقية بيحاربك بيهم برضة . تلاقي اللي بيرمية فراخ وكتاكيت . وتحس انهم مقتولين من التعذيب اللي يمكن شافوه في التدريب . والاهم انك ما تلمسوش . وعادي لما كل الفراخ تموت وكل الكتاكيت في سبيل حياة الفرخة الأكبر والأم . بس نفضل نحاول ونضرب ونستخدم أسحلة نارية وصاعقات كهربائية لعند ما بنخلص عليهم .
وبرضة الموضوع بيكون لسة ما خلصش .

لعبة الفراخ مش مجرد لعبة . دي اسلوب حياه .

لانك بالفعل مع التقدم في المراحل . بتكتشف ان الكل بيضحي عشان المجرة بتاعتهم .
بس بأسلوبهم . واللي انا كنت اقصدة . ان ليه ترمي الصغير عشان يحميك . مع ان المفروض ترمي بنفسك انت الأول عشان انت اللي تحمية .
ازاي تحمي مستقبل انت نفسك بتقتلة .
ازاي بتحافظ على مجرة او كوكب ما بيكونش فيه كتاكيت بكرة تكبر عشان تكمل مسيرتك .
ازاي تكون انت لابس ضد الرصاص . وبتستخدم كتاكيتك درع ليك . كل ده عشان تحميك .
طب ما هي الكتاكيت هتموت . وهيجي الدور عليك .

وعشان كل اللي فات دة واقع حقيقي عايشين فيه . قلت انها مش مجرد لعبة دا اسلوب حياه بنعيشة .

حاسس ان دا كافي عشان يتفهم اللي قصدي عليه .  وبرضة ما انساش اضيف شوية صور .
 






كمان حابب اقول ان الموضوع مش بس يتبصلة من الزاوية دي . لانه لية اكتر من زاوية يتبصلة منها . 
الاهم انها مش مجرد لعبة .



تعليقات

  1. يمكن لأن الصغاريين هما اللي مخدهمش حاجة يخافوا عليها,!
    وكمان عايزين يبنوا مستقبلهم بس عندهم خشم زي ما بيقولوا فمش بيفكروا انهم هيموتوا ولا لا,هما بيفكروا ف اللحظة ,!!
    والصغار كمان بيبقي عنهم طاقة وحماسة مش عند الكبار ,الكبار خلاص شبع خبرات وبئا عقلاني زيادة عن اللازم ..!

    ردحذف
  2. مساء الغاردينيا
    هي ليست مجرد لعبة بل أسلوب حياة
    لو تفكرنا به لوجدناه قريب من حياتنا بكل ظروفها "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  3. ياسمين . بشكرك على تواجدك الدايم اللي بيسعدني اكيد جدا. بشكرك على ردك كمان ووجهة نظرك .

    كلامك صحيح كله ما فيش كلام . ان الصغار هما المستقبل ، هما اللي بيفوتوا في الحديد من غير تفكير ، وبيجازفوا من غير ما يفكرا في النتائج . وكمان انهم كلهم طاقة وحماس ربما انها ماتت من زمان في الكبار .
    وانا كنت اقصد كمان ان لية مع كل دا . ما يكونش الصغير هوا المحمي بالكبير . ويكون الكبير ظهرة وصدرة . لية الكبير يخاف على نفسة مع ان نفسة ما تساويش من غير ذاك الصغير .

    تشكراتي ليكي وتحياتي .

    ردحذف
  4. مساء الهنا عليكي ريماس .
    سعيد بتواصلك وتواجدك اللي منور دايما .
    ويزيد الموضوع بريقا بالغاردينيا .

    هي ليست مجرد لعبة . هي اسلوب حياه .
    حقيقة اذا تأملنا بها لوجدناها واضحة وضوح الشمس .
    وكما اضفتي فهي في حياتنا اليومية . بكل الظروف التي نمر بها . وفي كل المجالات . نجد ان هناك تلك الفرخة الكبيرة العملاقة . وهؤلاء الكتاكيت . ونفس السيناريو نجدة يتكرر .

    تشكراتي ليكي وتحياتي

    ردحذف
  5. انا مش هعلقك الصراحه لأنه بالنسبالي > مبحبهاش الصراحه < بس وجهة جديده اضيفت ليا :))
    افهم بقاااااا معلش :D هو ايه الغاردينيا ديه :D
    > واعتذر على التطفل :)) <

    ردحذف
  6. Gelan Ez بشكرك طبعا على وجودك ومرورك .
    وعلى موضوع اللعبة . فكان القصد والمقصود ان وجهة النظر الجديدة دي انها تضاف ليكي زي ما حصل :)) ودا المطلوب اثباتة . واهو حصل . الحمد لله .

    وعلى موضوع الغاردينيا فهي : جنس نباتي يضم 250 نوعاً من الفصيلة الفوية، وموطنه المناطق المدارية وشبه المدارية في إفريقيا وآسيا وأوقيانوسيا .
    شجيرة معمرة دائمة الخضرة تزرع لجمال أزهارها العطرية القطيفية.
    ودة رابط عشان تتعرفي اكتر عليها http://ar.wikipedia.org/wiki/%D8%BA%D8%A7%D8%B1%D8%AF%D9%8A%D9%86%D9%8A%D8%A7
    دة طبعا بالاضافة الى انه جوجل ما بيقصرش .

    تحياتي وتشكراتي ليكي على دوام التواصل اللي بيسعدني ويشرفني تواجدك .

    ردحذف

إرسال تعليق

رافعين معنوياتي . رأيك يهمني . ردك يسعدني .

المشاركات الشائعة من هذه المدونة

الحلم الأزرق

ملعون أبوها الحمامة أم غصن زتون ..

الشيطان يحكم ..