محلك سر ..

ياه على صعوبة الكلام لما ابقى عايز اقول واحكي حاجات كتير ،  ومش عارف .

فعلا شيء صعب . واحساس بالخنقة .

متشتت اصلي في اكتر من حاجة .

وكل حاجة معاها يجي خُمسُمية حاجة .

والخُمسُمية حاجة مرتبطين بكذا حاجة .

وحاجات كتير في دماغي . كل ما اجي ارتبها .

كل ما اجي انظمها واسنتفها . الاقي نفسي فيها تايه .

بنسى يمكن ساعات هوا اية كان قبل اية .

يعني منين كانت البداية ؟!

بنسى البداية وعشان كدا بتضيع مني النهاية .

اصلا ما بوصلش ابدا للنهاية .

افضل افكر ، واعيد وازيد يمكن اني اعرف اعبر .

بس برضة للاسف . بوصل لحيطة سد .

حيطة سودة ، حيطة بيضه . مش مهم . المهم انها حيطة .

بمشي في طريق . وبفضل امشي ، امشي ، واسير لعند ما اوصل لمافيش .

يمكن اوصل لبير عميق . والبير كمان ما يكونش فيه ميه .

اكمل طريقي . وافكر اعود . والاقي تاهت مني الطريق .

وابقى بين البنين . لا عارف منين كنت بادي . ولا عارف وصلت لفين .

اه منه صحيح طريق .

ودا مش مره ، ولا حتى مرتين . دا كل مره .

كل ما اجي اقول خلاص . اصحى ، فوق .

الاقي الدنيا بتقولي ، حاسب لتقع من فوق .

خليك في مكانك . وفي مكانك محلك سر .

لا تخطي خظوة لقدام . واياك تمر .

خليك في مكانك واياك تفر .

قالت اية ؟! دي قالت حاجات كتير .

قالت ان : فية ناس بتحب تبرر حاجات فـ دماغها هي بس . وقولت :  حقيقي انا مش عارف اية مشكلة الناس دية . انها تبرر حاجات في دماغها . دي حاجة ما تزعلش .

ما دام المبرر هوا اللي لنفسة بيبرر . وان الحاجات في دماغ المبرر بس . يعني وجع الدماغ والحكاية من البداية للنهاية مع المبرر وللمبرر وفي المبرر . يبقى دي مشكلة المبرر .

لكن لو المبرر بيبرر لناس تانية . فهنا نقول ان الموضوع مش حاجات في دماغ المبرر بس . لانها كدا بقى في طرفين .

اللي بيبرر واللي بيتبررله . وكدا الحاجات خرجت من النطاق بتاع دماغه بس عشان يبقى دماغ الاتنين .

قالت : بتحب تنسى وتجيب اللوم على غيرها ، وقولت : طب بتحب تنسى دا مش مشكلة الاخرين . فربما تكون طريقة النسيان بالنسبة للي طالب النسيان الحل الوحيد أو الافضل من وجهة نظره . واما بتجيب اللوم على غيرها . فدا صحيح اللي ما ينفعش . مع انه واقع أليم كلنا عايشين فيه . انا عايز اجيب لوم الغلط على غيري ، زي ما غيري عايز يخلي اللوم عليا . وافضل طريقة في النقطة دي ان اللوم على الجميع . وما فيش حد يستحق انه يتحمل اللوم كاملا .

قالت : ناس عايشة حياتها بحريه ، وبتحب تقضي وقت ما بين سطور هنا وهناك .

وقولت : يا مااحلاها عيشة حرية ما بين سطور ، وع السطور ، وبـ السطور بنعيش الحرية .

قالت حاجات كتيرة . وقولت برضة لايام كتيرة .

كلامها سمعته ، احترمتة ، صدقتة ، حسيتة ، فهمتة . وبعدين رديت عليه .

وايامي ماتت ، ضاعت ، تاهت ، مات الكلام كله فيها .

وبعدين تعالى يا شرقاوي هنا . هوا لية انت بتحب تحكي في المحكي . 

اللي فات عديه . وكأنة مات . ولو ما مات اقتلة جواك ما دام مش هيحييك . 

ولو الحكاوي القديمة بتزيد الألم ، بتزيد الجرح جواك . ما تحكيهاش .

الماضي دا ، نتعلم منه . منه نخطط لحاضرنا وعشان حاضرنا هيجي يوم ويبقى ماضي بيه بنخطط لمستقبلنا . 

ولو وقفنا عند ماضينا ، وقعدنا كل يوم نحكي ، هنفضل ثابتين مكاننا ( محلك سر ) بالظبط زي حكاوينا .