فاقد الشيء لا يعطية

طب وبعدين طيب . هفضل قاعد كل يوم أقول أكتب وما أكتبش . بحجة إني ما كتبتش من زمان وإني ما بعرفش أكتب .
أكونش صدقت نفسي مثلا وإفتكرت إني بعرف أكتب ولا حاجة !
لا فوق يا شرقاوي . فوق لنفسك وأصحى . وأعرف مقامك .
مجرد شخابيط .
ع العموم أدخل في الموضوع على طول .

فاقد الشيء لا يعطية 

دايما بسمع الكلمة دي . وهيا طبعا معروفة ومفهوم معناها تماما مش محتاجه شرح . ولا فزلكة ولا فلسفة .
بس أنا شوفتها بزاوية تانية . والزاية التانية جايز تكون فزلكة شوية مني . بس ما فيش مشاكل . فزلكة فزلكة . ما حدش وخد منها حاجة . أنا بس بقول إن إزاي حد ما اتحبش - يحب . والعكس كمان أنه ما اتكرهش فإزاي يكره .
ما حدش اداله قلب فإزاي يدي لحد قلبه . وما فيش اللي اداله عقله فيقوم يعطيله هوا عقله .
هوا في الاساس افتقد الشيء دا من الآخرين وفي المقابل مش هيعطيه للآخرين .
حتى لو هوا ملكه . ومعاه . مش هيعطيه لحد . لإن ما حدش أعطاله دة في البداية .

اديني قلبك وخد قلبي . اديني جرام محبة اديك وقية حنان . اديك بزيادة حبة توزع ع الجيران .

مطلوب مننا كلنا ( جميعا ) أننا نبتدي من نفسنا نعطي اللي لدينا دا . واللي معانا . عشان كلنا ما نبقاش مفتقدين الشيء اللي بالتالي مش هنعرف نعطيه .
يعني المليان يعبي ع الفاضي . واللي معاه يدي للي معهوش .
في النهاية هتكون النتيجة انه كلنا هيبقى معانا الشيء . ومش هنكون مفتقدينة . وبالتالي هنعطية .

نفسي : تصدق انت انسان هايف . وبايخ وخايب .

انا : بايخ وخايب نفس الحروف على فكرة .

نفسي : مش بقولك هايف . انت كل الكلام دة وعمال تعيد وتزيد فيه ع الفاضي . انت بتحب تخترع ليه . يا عم الكلمة معروفة ومفهومة ومش محتاجة يعني كل الحوارات دي . وبعدين حتى لو عايز تفتح حوار كانوا كلمتين وخلصنا . ويكون خير الكلام ما قل ودل .

انا : بصي . انتي اسكتي خالص عشان انا ليا كلام معاكي كتير في الايام اللي جاية . وهتموتي من الضرب . ما نشوف انا ولا انتي . دا انا هفضحك ع النت . واقول لكل الدنيا عليكي وعلى عمايلك . وهعرفهم قد اية انتي حقيرة اصلا وانا اللي مخليلك قيمة .

نفسي : انا .. دا انت اللي هترجع راكع تترجاني اعفو عنك وتقولي معلش . اصل كانت الحماسة واخداني شوية . بس انا قلبي كبير وهسامحك . وهستقبلك .

انا : دا بعدك . طب بكرة نشوف . انا ولا انتي .

المهم بقول اية . انا قولت الكلمتين اللي عندي . ودة كان بالمختصر المفيد او الغير مفيد . الأهم اني قولت . وبدأت .