| 6 التعليقات ]

السلام عليكم ورحمة الله وبركاتة 

النهاردة 5 سبتمبر 2013 م ودة معناه ان النهاردة يوم ميلادي بس دا كان من زمان سنة 1987 م
النهاردة عمري 26 سنة 
يعني 312 شهر 
ودة بيساوي 1,356 اسبوع 
وبالايام هلاقي ان عندي 9,497 يوم
ولو جيت احسبها بالساعات هلاقي ان عندي 227,941 ساعة 
وما فيش مشاكل لو حسبنا الدقايق عشان الاقي انه 13,676,469 دقيقة 
وهيا يعني هتيجي ع الثواني ، عمري بالثواني 820,588,145  ثانية 

يااااااااااه دا أنا عايش بقالي كتير أوي . ثواني ودقايق وساعات وايام وشهور وسنين .
بس الأهم من كل دة ، إية اللي أنا استفدت بيه ، واية اللي اتعلمتة ، واية اللي انجزتة في كل الايام دي ؟
السؤال الأهم اية اللي المفروض أفكر فيه عشان حساب الايام اللي جاية ؟
السؤال هوا ، هوا انا فعلا واخد بالي من اللي فات ؟ هوا انا فعلا ملاحظ اني بكبر كل مدى وعمري بيقل ؟
بتمر بيا الأيام . وتعدي بيا الشهور ، وتفوت من بين اديا السنين . وانا ولا حاسس .
كم يوم راحوا في الفاضي . وكم راحوا في النوم . وكم راحوا وانا في معاصي . 

كم حب شوفته وقابلته .وكم حب عشته . يمكن سابني ويمكن سبته .
كم دمعه نزلت ، وكم دمعه حاولت وفشلت . 

كم ضحكة طلعت ، وكم ضحكة اتكتمت .
قد اية جاملت ، وقد اية اتجاملت . 
كم كتاب قريتة . وكم واحد قريته . وكم واحد قراني . 
كم واحد عرفته . وكم واحد عرفني . 
كم صاحب علمت عليه . وكم صاحب علم عليا .
كم مرة فكرت ، وكم مرة اتغبيت .

هوا انا اقدر اقعد احسبها دقيقة دقيقة . يااااااااااه على كل الدقايق دي .
المشكلة انها راحت . فاتت و ماتت . ومش هترجع .
مش هقدر احسبها .

الأهم اني افتكرها . وافتكر ان الدقايق شغالة وما بتقفش .
زي ما هيا شغالة دلوقتي . كتبت او ما كتبتش . شغالة ما بتسكتش .
ما بتستناش . ولا يهمهاش . فوقت او مافوقتش .

طب سؤال تاني . هوا انا كبرت فعلا ولا صغرت ؟!

6 التعليقات

habiba يقول... @ 6 سبتمبر، 2013 2:35 م

السلام عليكم
كل عام وحضرتك إلى الله أقرب وعلى طاعته أدوم :)
الدقايق والثوانى دى كلهاهنتحاسب عليها ثانية ثانية سبــحان الله...جميل ان الواحد يقف مع نفسه يوم ميلاده ويفكر كده ويحاسب نفسه قبل ما يتحاسب...

" ما بتستناش . ولا يهمهاش . فوقت او مافوقتش "
فعلا الزمن بيعدى ومش بيهمه أى حد ولا أى ظروف...
والسـؤال الأخير...إجابته مش بالسنين..
بالخبرة وطريقة التفكير والأهداف اللى بنجددها ونسعى لها.
تأملات رائـعة...
تحياتى...وكل عام وأنتم بخير :)

amiraali يقول... @ 7 سبتمبر، 2013 2:42 ص

كل سنه وحضرتك طيب وبخير..
اي ان كان ايلي فات كان فيه ايه ..فهو فات خلاص
..اهم حاجه ايلي جاي...
ربنا يكرمك
ان شاء الله

Nelly Aly يقول... @ 8 سبتمبر، 2013 4:29 ص

كبرت ولا صغرت..بناء علي روحك, أثرت فيها الدنيا وخلتها دبلان وعجوزة ولا مأثرتش فيها ولسه طفولية!!

أما اللي فات راح وانقضي الأهم اللي جيه..وإن شاء الله يكون خير يارب.

نيللي علي
مدونة عطر الأحباب

عالم سمسم يقول... @ 8 سبتمبر، 2013 6:16 ص

حلو الواحد يوصل لمستوى التفكير ذا .. أحييك

شمس النهار يقول... @ 8 سبتمبر، 2013 11:33 ص

كل سنة وانت طيب وبخير وصحة وسعادة

ومحقق كل احلامك

بس بدري اوي تسأل السؤال ده
اومال انا اعمل ايه بقا؟؟
عشت 54 سنة
:)))

جيلان حمزة يقول... @ 23 نوفمبر، 2013 12:36 ص

البوست ده دعوة للتفكير .. خلتني سرحت اوي و سألت نفسي هو انا عملت ايه في حياتي دي كلها ؟؟؟ فعلا الوقت كالسيف إن لم تقطعه قطعك ... واحنا مش بناخد بالنا من الدقايق و الثواني و بنستهون بيها مع انها فعلا بتجري وبتاخد عمرنا و شبابنا معاها

تحياتي الحارة
وبكل معنى الكلمة مدونتك رائعة
شكرا

إرسال تعليق

رافعين معنوياتي . رأيك يهمني . ردك يسعدني .