| 4 التعليقات ]

عشان امبارح قولت انه المفروض اجي كل يوم واقول كلمتين . واتكلم عن اي موضوع  . 
حتى لو انا مش عارف اية هوا الموضوع واية هيا الفكرة اللي المفروض اتكلم فيها او عليها . 
فأنا جاي النهاردة احاول اني استجمع الافكار في كتابتي . ومن بين الحروف اكيد  هتظهر فكرة او اتنين . 
المهم . 
ان انا من فترة كدة كنت مريت على موقع حابب ان الجميع يشوفة ويقلب بين صفحاتة . 
لأنة أكيد هيشوف فيه اللي من زمان بيفكر فيه . وبيسأل عليه . 
احيانا بتيجي في بالنا أفكار وتخيلات بيتهيألنا انها مش موجودة وانها بعيدة . 
يمكن حاجات ما بيكونش في بالنا انها اصلا شيء ممكن يكون موجود . مجرد انها خرافة أو أسطورة .
بس بنكتشف انها احتمال تكون اكتر من انها مجرد خرافة . وانها احتمال كبير يكون أمر واقع . 
وفية حاجات ما نتخيلش انها تحصل وبتحصل بالفعل . 
وأمراض كتير ما نسمعش عنها . وبتقابلنا بالصدفة البحتة اللي ساعتها بنقف قدامها مزهولين ونقول هوا فعلا ممكن يكون فية شيء كدة ؟! ويكون السؤال طب ولية ما جاش في بالنا انها فعلا ممكن تكون موجودة ؟! 
اية المانع يعني . لية لأ ؟!

بداية القصة اني كنت بشوف موقع اخبار . ومن بين الاخبار قابلني خبر بيقول : ان فية قسيس باين ، شخص ما يعني ، كان متهم باغتصاب الاطفال . ( طبعا الخبر مش غريب . وبيتكرر كل يوم وأصبح شيء عادي ، ما حدش بقى يشمئز منه او يستغرب ) . 
بس المهم ان بنته قالت ان والدها مصاب بمرض اسمة ( البيدوفيليا ) وانا في الحقيقة ما كنتش أعرف حاجة اسمها بيدوفيليا . وكنت اول مرة اسمع المرض دة . 
وانا في العادة اللي ما بعرفوش بروح ابحث عنه عشان الصورة تبقى كاملة وواضحة . 
ووانا ببحث قابلني الاغرب . واتاري ( مش الاتاري اللي بيتعلب بيه بتاع ماريو ) مش هوا دة المرض بس اللي ما كنتش اعرفة او اني اسمع عنه . لأ دا فية كتير زي دي امراض . وحاجات عمري ما كنتش اتخيلها . 
 فية حاجة اسمها ( نيكروفيليا ) وفية كمان ( الزوفيليا ) وفية كتير زي كدة وأكتر . 
لأ وياريت الموضوع وقف عند هذا الحد . ومجرد أمراض شاذة . 
دة كمان اساسا فية علم اسمة ( علم ما وراء الطبيعة - الميتافيزيقا ) علم كامل وما كنتش أعرف عنه . 
والاساطير والحكاوي اللي كنا نسمعها عن السلعوة والاشباح ، والسحر وأسرار الاحلام . 
 وكل الحاجات اللي ما وصلوش فيها لحل . او تفسير . 
كل دة موجود في مواقع متخصصة في العلم دة . وفي الاساطير والخرافات والاسئلة الكتيرة دي . 
طبعا كمان ما انساش ان موضوع المسيخ الدجال . والاطباق الطائرة والفضائيين . ويأجوج ومأجوج . وكل كل تلك المواضيع برضة موجودة . وابحاث وكتابات وقصص وكثير من المواضيع بتتكلم عن كدة .
انا جايب موقعين بس . بس فيهم الكتير . وفيهم كمان مواقع شقيقة متخصصة في نفس الموضوع . 
وعشان انا شايف ان القراءة لازم تكون في كل المواضيع . ولازم نكون عندنا علم ومعرفة عن كل شيء .
وناخد من كل بستان حتى ولو وردة . فأنا قررت اني اضيف كلماتي والموقعين اللي اشرت ليهم .  
وبالفعل الموضوع شيق ويستحق البحث .

اضغط على المواقع ادناه لتدخل الى عالم ربما كان بعيدا عنك .   

موقع كابوس


موقع ما وراء الطبيعة 


 
وفي كل موقع من اللي فوق فيه قسم اسمة - مواقع ذات صله ( وهي عبارة عن مواقع شبيه وبتتكلم في نفس الموضوع ) 

ولمعرفة تعريف علم ما وراء الطبيعة اضغط هنا


4 التعليقات

ياسمين يقول... @ 3 يناير، 2013 11:23 ص

بداية هو القسيس ازاي ليه بنت ؟هما بيتجوزوا أصلا..هو خارج الموضوع بس دخل دماغي,مش عارفة ليه المرض دا ,بس هادور عليه,مفيش أي مبرر لواحد متخلف بينتهك حرمات الناس ويقتل طفولة في مهدها..المرض اسمه البني ادم دا حيوان !! ..
قرأت مرة عن ان فيه قبائل بتأكل دماء البشر وهي موجودة فعلا,,!
اكيد هقرأ في المواقع لضيق الوقت نأجله لوقت لاحق
دمت بخير

مسلم مصرى يقول... @ 10 يناير، 2013 11:34 ص

أنا باتفق مع ياسمين ان ده حيوان
بس عادى كلنا عارفين ده :)
وكنت أعرف علم ما وراء الطبيعة ولكنك أثرت فضولى حول الأمراض اللى بتتقال دى
فشكرا على المعلومة
تحياتى المعطرة

SHARKawi يقول... @ 11 يناير، 2013 2:35 م

أشكرك ( ياسمين ) على مرورك ودوام تواصلك اللي بيسعدني .
وعلى موضوع القسيس . فهوا تقريبا كان كدا . انا مش فاكر الخبر بالظبط . وعامة القصد انه اي شخص والسلام . عجبني جدا وصفلك ( دا مرض اسمة البني أدم دا حيوان ) مظبوط كلامك ولا حدش يقدريقول حاجة عنه . وفعلا موضوع آكلين لحوم البشر موجودين . واللي بيشربوا دماء البشر . ودراكولا ومصاصين الدماء مش شيء خيالي او انه شيء بنشوفة في الافلام بس . دا قصة ليها اصل وفصل . ودا برضة موجود في المواقع اللي قولت عليها .

تحياتي ليكي وتشكراتي .

SHARKawi يقول... @ 11 يناير، 2013 2:38 م

شكرا ليك ( مسلم مصرى ) على ردك ومرورك الجميل .
ويا عزيزي دا انا كدة اكون قدرت اني اعمل الشيء اللي عايز اوصلة ( اثرت فضولي ) دا المطلوب اثباتة .
الحمد لله اني اكون قدرت اوصلك الشيء اللي انا عايزة . وانه هوا فيه حاجات كتيرة غايبة عننا . في المقابل لازم اننا نبحث عنها ونقرا عنها حتى لو كان اي موضوع .
دا بالاضافة اني بحب ان الشيء اللي اوصلة او اشوفة . اني اشارك بيه الجميع .

تحياتي ليك وتشكراتي . مع تمنياتي بتكرار الزيارة ودوام التواصل .

إرسال تعليق

رافعين معنوياتي . رأيك يهمني . ردك يسعدني .