ما بنحبهاش

صدقوني ولا حد فينا بيحب البلد دي .
مصر ام الدنيا . هوا دا اللي اتعلمناه من صغرنا .
مصر بنبحبها ونفديها بدمنا . شعارات اتربينا عليها .
مصر اجمل بلاد العالم . هيا الحضارة هيا الثقافة هيا الجمال . هوا دا اللي دايما نقولة .
بس مش مؤمنين بيه . ولا حاسينة . وكتير مننا مش عارفينة .

كبرنا وكبر معانا كلامنا . فبقى اللي يقول مصر ام الدنيا . يرد التاني يقول : طيب مين ابوها ؟
ودا مثال من ضمن امثلة كتيرة بقت تتقال .

بس اللي عايزة فعلا ان الجميع يقعد شوية مع نفسة . ويصادق نفسة . ويراجع امورة . ويشوف هوا فعلا حبها . هل فعلا حس بجاملها . شاف الروح اللي موجوده فيها ومش موجوده في غيرها .
ولا بس كلام بيتقال . عشان مش لاقي غيرها . وعشان اتولد لقى نفسة فيها .

في المدرسة علموه النشيد الوطني . وحفظوة انه لازم يحب بلده .
حتى الحب ما عرفهوش ازاي يحب . بس حفظوة انه لازم يحب . فكبر لقى نفسة بيقول بحب .
قالوله ان بلدك عظيمة . بلدك الحضارة . بلدك التاريخ كله .
فكبر وبقى دا سلاحة اللي بيحارب بيه أي حد يكلمة . وبمجرد ان التاني واللي بيعتبرة عدو مش بيحب البلد يبدأ الكلام . يقوم دا رادد وقايل : لأ .  دا انا بلدي هيا التاريخ وهيا الحضارة . ويبدأ بقى يجيب حاجة حاجة من اللي حفظها . ويمكن اللي جمبة يغششة حاجة ولا اتنين من اللي نساهم . فيقولة انظف ميا عندنا . احلى قطن . ويبدؤا يغنوا مع بعض وعلى بعض .

مشكلة بلدنا (  احنا . مش حد تاني ) .

من اصغر واحد في الشعب . لأكبر واحد .
ومن عامل النظافة للرئيس . ما حدش بيحبها .
كله بيحب نفسه . وبيفكر في نفسة .
وعشان كدة البلد ما لقتش حد يحبها ولا يبفكر فيها . فتاهت وضاعت وباظت وخربت .

ما ليش في السياسة ولا احبها . بس برؤيتي السازجة الضعيفة . اقدر اقول ان حل البلد دي بسيط جدا .
واسهل منه ما فيش . وانا كنت قولت قبل كدة في موضوع ( مجلس رؤساء )
وموضوع ( لماذا لا للاخوان ؟ )
ووضحت رؤيتي في ازاي المجلس كان هوا الحل الوحيد . والصحيح . وانه لية كان لأ للاخوان .

وعشان احنا مش عايزين ايادي تصلح في البلد . كل ايد تصلح بطريقتها .
احنا عايزين ايد واحدة . ومش معنى كدة انه شخص واحد . بس ان كل الايادي تتجمع وتبقى ايد واحدة .
دا حتى واحنا صغيرين كانوا بيدونا مثال بتاع العصيان . ان لو واحد اداك عصاية هتقدر وببساطة جدا تكسرها . انما لو اداك ربطة عصيان ولا هتقدر تعملها حاجة . دول عشان اتجمعوا .
وجايز تلاقي من بينهم عصاية ضعيفة . بس التانية اللي جمبها ولازقة فيها اجمد منها شوية فحافظت عليها .
ودا اللي عايزين نطبقة علينا . ونتعامل بيه مع بعضينا .

محتاجين بجد مش ثقافة سياسية . عايزين ثقافة سهلة وبسيطة وهيا ثقافة اننا ازاي نحب بعض .
لما بيجيلي السؤال اللي بيقول موقفي السياسي ولا رأيي السياسي دايما بتكون اجباتي وببساطة : كله بالحب .
ايوة كله بالحب . ان عرفنا ازاي نحب . نحب نفسنا ونحب بعضنا ونحب البلد اللي اتربت فينا وبنا ومن دمنا . ساعتها بس هنعرف اننا نقف قدام العدو الأكثر شراسة من أي كائن . وهوا الكره والحسد والحقد والطمع والجشع والانانية .

تعليقات

  1. مشكلة بلدنا ( احنا . مش حد تاني )

    مقتنعة جدا جدا

    ربنا يصلحنا لنرقى لها ..

    ردحذف
  2. بس مش مؤمنين بيه . ولا حاسينة . وكتير مننا مش عارفينة .

    اتساءل كثيرا ياترى المصريين بحبوا بلدهم فعلا وجدتنى ارد على نفسى : ان المصريين اصبحوا مثل الابن العاق لامه يرفع صوته عليها يجحد فضلها لا يطيعها ولا يجبر كسرها

    وعلشان كده بالتأكيد لو استمرت الحالة دى بالبلاد هتصبح مصر ( خرابة بادين اولادها ) للاسف

    الكل راع والكل مسؤل عن رعيته لكن اصبح التعبير عن الرأى بالقتل والسرقة والنهب والحرق والدمار واصحاب الاراء الصادقة ضاعوا وسط الصوت العالى والخراب

    اسأل الله تعالى ان يزيل الغمة ويفرج الكرب ويثبت الصالحين ويولى علينا من يخافه ويرحمنا

    سلمت اناملك اخى شرقاوى وان شاء الله الامل فى الله والخير قادم لامحالة

    تحياتى بحجم السماء

    ردحذف
  3. بلدنا عايزة حد يمسك السلطه يكون بيحبها

    وبيحبها بجد مش حنجوري
    الحب فعل مش كلمة وبس

    ردحذف
  4. بصراحه انا مش مصريه بس احب مصر حيللللللللللللل


    ودي ازور مصر

    ردحذف
  5. اشكرك جدا ( علا ) على مرورك ووجودك اللي اسعدني جدا . واتمنى ان يقتنع الاخرين كاقتناعك تماما .
    ربنا يصلحنا يارب . اللهم آمين .
    اتمنى دوام التواصل .
    لكي تحياتي وتشكراتي .

    ردحذف
  6. تشكراتي لكي استاذتي ( ليلى ) وجودك يسعدني كثيرا . اضافتك لها المعنى الكبير . قليل كلماتك يعني لي الكثير بكثير .

    اقتباس ( ان المصريين اصبحوا مثل الابن العاق لامه يرفع صوته عليها يجحد فضلها لا يطيعها ولا يجبر كسرها ) تشبيه في الصميم تماما . فالجميع اصبح ذاك العاق الذي يريد ان يرسل امه الى هناك في ذاك المكان المهجور . في ذاك المكان البعيد . بين الكثير من الامهات اللاتي نلن نفس العقوق .
    الجميع اصبح لا يبالي . يرفع صوتة لا مبالي . تصل به الحالة الى الجنون فيبدأ في التكسير والتخريب .
    يفتح ابوابا مغلقة . يكسرها ، يدمرها .
    يغلق ابوابا فتحت . ولكن كيف ولم تعد هناك ابواب ليغلقها . ضاع الامان . ضاع ايضا منه ذاتة .

    اقتباس ( .. هتصبح مصر ( خرابة بادين اولادها ) ) . حزين وانا اخبرك انها في طريقها سيدتي .
    هذا ما يحدث الآن . تنفيذ للخراب ذاتة . المعنى الحقيقي للخراب . ما نحن فيه الآن .

    ذكرتي استاذتي ان التعبير بالرأي اصبح بهذا الشكل الذي وصفتية . واضيف انا انه لم يعد هناك من الاساس تعبير عن رأي . لأنه لم يعد هناك رأي .
    ضاعت الرؤية . اصيب الجميع بالعمى .

    ولكن ها هو دعائك أدعو ايضا به الله ، فاللهم تقبل الدعاء ( اسأل الله تعالى ان يزيل الغمة ويفرج الكرب ويثبت الصالحين ويولى علينا من يخافه ويرحمنا ) اللهم آمين .

    تشكراتي لكي لا تكفي . ولكن ادعو لكي بالسعادة . كما اسعدتيني بوجودك وكلماتك . لكي مني تقديري .احترامي . لكي مني تحياتي .
    اتمنى دوام التواصل .

    ردحذف
  7. اشكرك جدا ( شمس النهار ) على وجودك ومرورك اللي اسعدني كتير . وكما ذكرتي انتي بكل تأكيد نحتاج ذاك الرجل العارف الواعي للمعنى الحقيقي للحب . والحب لا يفهم فقط نحسه . نتذوقة .
    نريد ذاك المتذوق . ليعرف كيف الطريق لينشر حبه بين الجميع .
    اقتباس ( مش حنجوري ) عجبتني جدا الكلمة دي . اكيد طبعا . اصل الحناجر كتير . فية اللي بيغني وفية اللي بيمثل وفيه اللي بيزعق . وفية كتير .

    تشكراتي تقبلي تحياتي وتقديري .كامل احترامي .
    اتمنى دوام التواصل .

    ردحذف
  8. اشكرك ( بهاء ) على وجودك ومرورك الجميل .
    اشكرك على احساسك الرقيق .
    وصدقيني لو قلتلك ان مصر كمان بتحبك . مش هزار او كلام او انها رد لمجاملة . ولكن من يحب ( كسر الحاء ) يحب ( فتح الحاء ) .
    واعتبري انك مصرية . فكلنا مصر . ولا تقتصر مصريتنا في جنسيتنا . ولا مكان ولادتنا . شرف لي ولنا وجودك بيننا . واما عن زيارتك . فهذا امر مفروغ من النقاش فيه . فلابد لكي وان تزوريها . فقط انوي . ودعي الباقي علينا . تشرفينا في اي وقت .

    لكي تحياتي وتشكراتي . لكي تقديري واحترامي .
    اتمنى دوام التواصل .

    ردحذف
  9. انابعشق مصر

    ردحذف
  10. اشكرك ( بدون اسم ) على وجودك . وردك . اكيد مبسوط بيه .
    انت يمكن بتعشقها . بس ما بتحبهاش . وفية فرق اكيد في المعاني .
    وكمان المقصود انه لو فعلا بتعشقها . ودا شيء انا واثق فيه . فإية الافعال الدالة على عشقك ليها .
    الحب والعشق معاني كبيرة مش بس كلام بيتقال .
    كلنا بنحب ونعشق . بس مين فعليا بينفذ ويطبق حبة وعشقه دا .

    اتمنى دوام التواصل .
    تشكراتي . كامل احترامي وتقديري . دعواتي . تحياتي

    ردحذف

إرسال تعليق

رافعين معنوياتي . رأيك يهمني . ردك يسعدني .

المشاركات الشائعة من هذه المدونة

الحلم الأزرق

ملعون أبوها الحمامة أم غصن زتون ..

الشيطان يحكم ..