2013 سنة جديدة . بس شكلها هيبقى اية ؟

في الحقيقة جاي أتكلم النهاردة من غير فكرة محددة في بالي . 
ومن غير حتى انه يكون عندي ملامح محددة عن اللي جاي اتكلم فيه . 
دا كمان بالاضافة ان الساعة عندي دلوقتي 11:45 م . يعني كلها ربع ساعة واكون في يوم جديد .
النهاردة كمان 1 / 1 / 2013 م . يعني سنة جديدة . والسنة الجديدة بتكون دايما محتاجة وقفات لاعادة الحسابات .
ودة بيكون على المستوى الشخصي والمهني .
ودة مش معناه ان كل سنة كلنا بنعيد حسابتنا وبنقف شوية مع نفسنا . لأ بالعكس . السنين بالنسبلنا عادية جدا . ما فيهاش اي تغيير . السنة بتفوت . بتعدي . ويجي وراها السنة تفوت برضة وتعدي . وما عندناش اي مشكلة ولا مبالاه . 
ولا فكرناش مثلا ان حياتنا هي اللي بتنتهي . وان عمرنا هوا اللي بيعدي . 
عشنا كم سنة ؟ عملنا اية في الكم سنة ؟  اية وضعنا واية انجازتنا ؟ راضيين احنا عن نفسنا ؟ 
الحياه اصلا كلها والدنيا بقالها كم سنة ؟ وهتفضل كمان كم سنة ؟ اية اللي فات واية اللي جاي ؟
أسئلة أسئلة أسئلة . وكلنا بنسألها لنفسنا .  بس مجرد السؤال بس . وما بندورش على الاجابة . 
بنستسهل اصلنا . وبنقول اهي حياه وبتعدي . حياه وهتعدي . 

بتكلم بأسلوب عام . وكإن الناس كلها كدة . ودة طبعا غلط تماما . غلط مقصود ومش مقصود . 
بس مش مشكلة اللي جاي هيبقى عني شخصي . 
ما هو انا ما عنديش الحرية ولا الصلاحيات اللي تخليني اتكلم عن الجميع . 
بس عندي الصلاحيات يمكن اني اتكلم واحكي للجميع . 

صدمة جاتلي كدة النهاردة فجأة مش عارف لية . 
لما تحس انك دايما خاسر  . مهما تحاول انك تفوز وانك تكون الرابح برضة بتكون في النهاية الخاسر . 
لما تقدم السبت عشان تلاقي الحد . وما تلاقيش . تقوم تقدم الاسبوع عشان تلاقي في النهاية نتيجة الاسبوع ، برضة ما تلاقيش .
تحاول مرة واتنين انك تقوم . وكل ما تقوم تقع . 
تحاول تفهم كل شيء . وتلاقي نفسك في النهاية مش فاهم ولا شيء .
ان حبيت جايز يكرهوك . وان كرهتهم جايز تتقتل . ( تتقتل بكرهك اللي هيزيد ويوصل لكرهك لنفسك بعد كرهك لكل اللي حواليك )

صعب انك تفهم كل اللي حواليك واللي عايش في وسطيهم .
صعب انك تراضي جميع الاطراف . 
صعب انك تكون مثالي . 
صعب انك تحب الجميع .
صعب انك تلاقي ان كل شيء من حواليك صعب . 

السنة اللي فاتت . واللي قبل اللي فاتت واللي قبلها وقبلها . مريت بتجارب ، مريت بشوية حاجات ومحتاجات . مش عارف ليه اصلا مريت بيهم . ليه تعايشت وعشت التجارب دي . لية الحياه ما تكونش لذيذة مثلا وسهلة وبسيطة دايما . من غير بقى الموضوع بتاع التجارب والمآسي اللي بتعشها دي . لية لازم يكون فية الشرير . 
ولية الصراع الدايم بين الشر والخير . لية ما يبقاش كل حاجة خير . 

في نهاية كلامي اللي ما انتهاش . قررت اني احاول اني اكتب تدوينة كل يوم . حتى لو مش متظبطة وملهاش اي موضوع . 
واني افكر شويتين كتير . واحاول اني اوصل لحل اقرب الى النهائي الجزري . 

كل سنة وكل الناس طيبة وبخير وبصحة وسلامة .




تعليقات

  1. احترمت وقفتك مع نفسك جداا..
    بس مينفعش الدنيا تبقى خير بس .. دة هناك إن شاء الله -في الجنة-
    "هي دنياكم ليست كما الجنة"
    طول ما احنا عايشين هنمر بمواقف ربنا يختبر بيها ثقتنا فيه وصبرنا، ومواقف نتعلم منها وناس يؤذونا بس نتعلم منهم لحكمة ممكن منعرفهاش دلوقتي بس نعرفها قدام
    مفيش حد بيخسر دايما، طول ما فينا نفس وبنحاول أكيد هنكسب وهنوصل فـ يوم..
    ومفيش حد مثالي لكننا بنحاول نوصل لأحسن حاجة..!
    ربنا يوفقك وإن شاء الله تكون السنة دي أحسن من كل اللي فاتوا :)

    ردحذف

  2. صعب انك تفهم كل اللي حواليك واللي عايش في وسطيهم .
    صعب انك تراضي جميع الاطراف .
    صعب انك تكون مثالي .
    صعب انك تحب الجميع .
    صعب انك تلاقي ان كل شيء من حواليك صعب

    فعلا عندك حق
    وسبب ان الدنيا متعبة انها مش الجنة واحنا لازم نتعب فيها عشان ربنا يجازينا فى الآخرة

    كل عام وانت بألف خير وصحة وسعادة :)

    ردحذف
  3. اشكرك Radwa على مرورك . وعلى ردك اللي اسعدني .
    وفعلا زي ما انتي قلتي . ماكنتش بقت دنيا . هي دنيا عشان فيها الخير والشر . الحلو والمر .
    وهي بالفعل امتحان لينا . بنمر فيه بأسئلة كتيرة . ساعات نقف قدامها ما نقدرش نعرف جوابها الا في النهاية . ونمر على مطبات صناعية وطبيعية .نتألم ساعات وساعات نعديها ببساطة وسلاسة .
    اقتباس ( طول ما احنا عايشين هنمر بمواقف ربنا يختبر بيها ثقتنا فيه وصبرنا، ومواقف نتعلم منها وناس يؤذونا بس نتعلم منهم لحكمة ممكن منعرفهاش دلوقتي بس نعرفها قدام
    مفيش حد بيخسر دايما، طول ما فينا نفس وبنحاول أكيد هنكسب وهنوصل فـ يوم..
    ومفيش حد مثالي لكننا بنحاول نوصل لأحسن حاجة..! )

    كلماتك صحيحة مية المية . جميلة ورائعة جدا . بسيطة وحقيقة لازم نؤمن بيها .

    ربنا يجعل السنة الجديدة سعيدة عليكي . وتكوني في نجاح دايم يوم بعد يوم .

    تحياتي ليكي وتشكراتي .
    مع تمنياتي بتكرار الزيارة

    ردحذف
  4. شكرا ليكي ( مروه زهران ) على مرورك وردك اللي نورني .
    وطبعا ودة شيء أكيد زي ما انتي قلتي وبرضة زي ما Radwa كانت قالت . ان دنينتا مش جنة .

    اقتباس ( وسبب ان الدنيا متعبة انها مش الجنة واحنا لازم نتعب فيها عشان ربنا يجازينا فى الآخرة )

    عندك حق اكيد .

    كل سنة وانتي بصحة وسعادة ونجاح .
    تحياتي ليكي وتشكراتي . مع تمنياتي بتكرار الزيارة اللي بتسعدني .

    ردحذف

إرسال تعليق

رافعين معنوياتي . رأيك يهمني . ردك يسعدني .

المشاركات الشائعة من هذه المدونة

الحلم الأزرق

ملعون أبوها الحمامة أم غصن زتون ..

الشيطان يحكم ..