| 0 التعليقات ]


الصخر لو ينفجر .. النبع أية ذنبه 
سباق في ساحة مابين انسان وبين قلبه
مدام لموت أحمل السيف اللي بتحبه
وأذا أندفعت أندفع .. وأذا إن وقعت تسد 
طول عمره وطنك بيحلم تبتدي حربه
وجي يابلد الحرايق وأصرخي بجنون 
واحرقيها مدن
وكروم 
وناس 
وسجون 
ملعون أبوها الحمامة أم غصن زتون



معمولة لجل الضحايا يصدقوا الجلاد 
يا أيد يا متكتفه 
يا ظهر يامنجلد 
ياطفل مين ورثك الاحتمال والجلد ؟
يا طفل بهموم رجال 
يابنت قبل الولد 
يا أرض تطرح حصي 
ياقلوب بتطرح عند 
مين قال الكلاب تسكن عرين الاسد ؟؟



طلع مش مهم السلاح 
طلع يغني عنه الحجر 
طلع مش عويص الكفاح 
مدام فيه أرادة وبشر 


طلع مش بعيد الصباح 
ومستني خلف الشجر 



ومنين أجيب ناس لمعناة الكلام يتلوه 
أذا كنت باجي أقوله نص عقلي يتوه 
فمنين أجيب ناس لمعناة الكلام يتلوه  



الكلام مش مستجيب 
والصمت عار 
والمسافة بعيدة بين الفعل والقول البليد 
لكن نحاول 
لا القصيدة هتجري علي الأسفلت 
ولا ترمي حجر 
ولا فوق أكتافها راح تحمل شهيد 
ولاهتبعد خطر
ولا هتقرب بعيد 



الكلام أخر المطاف هو الكلام 
والدم دم 

القصيدة توصف الدم الزكي ما تشلش نقطة 
توصف الأم اللي ماتت بنتها قدام عنيها 
بس وصف ! وصف جيد وصف خايب 
وصف صادق وصف كاذب
في النهاية كلة وصف 
كل شعر الوصف .. ما يساويش في سوق الحق صرخة 
الكلام عن كل دا شيء م التطاول 
إنما .. لازم نحاول 

والقصيدة مشكلتها في التناول
مشكلتها في البداية والنهاية 
مضامينها وشكلها وعديد من المسائل 
القصيدة قصيدة .. بس الفعل فعل 
هل نكف عن المحاولة ؟ أو نحاول ؟

لو سكتنا يقولوا ضاعوا 
لو وقفنا يقولوا باعوا 
وإذا قلنا 
يقولوا فين الكلمة من رمية حجر ؟
صرخة قتيل 
ثورة الأطفال تخلي الشعر لو كان عبقري 
وزنة قليل 
يا رفاقة شعرنا ماهوش بخيل 
اعذروا الشعرا إذا خرسوا النهاردة 
وإعذروا الكلمة إذا إحتارت ودارت
النهاردة الغنوة للأفعال 

وأعذروا العواجيز إذا صمتوا النهاردة 
واستكانوا للرقاد في الصمت مدة 
النهاردة الصرخة للأطفال 

الكلام ما يشلش جثة 
الكلام ما فهش دم 
الكلام مافهوش هجوم ولا تراجع 
الكلام مالوش لجان 
الكلام ماهوش محاصر بالمدافع
لا دكاكينة بتقفل .. ولا تتسمم غيطانة 
ولا قاطعين عنة نوره أو مياهه
ولا ممنوع م العمل 
ولا مشلول بالحصار الإقتصادي
ولا بالغاز المسيل للدموع
ولا بيعاني عطش ويعاني جوع
زي أصغر طفل ف الوطن المقاتل 
نسكتوا ولا نحاول ؟
لأ نحاول

حبيبتي كل ما بنسى تفكرني الحاجات بيكي 
ائنك تدمعك عيني كأني مش هغنيكي 
دمايا ما تستهلش تكون كحلة ليلة لعنيكي 
وأنا الدرويش ..
أنا السابح بمسبحتي .. ومبخرتي .. وتوب الخيش 
أغني لك وأمول لك مواويلك
ما تسمعنيش ولا تشوفينيش
ومش لازم مدام عايشة
مادمت باعيش

وياما بيكي عقلي اتجن
وانتي الأن .. أنتي الظن .. وأنتي قلمي لحظة فن 
يا غنوتي .. أنا أحزن أغانيكي 
وإنتي الحلم 
آه من حلم 
لا نسيني ولا نسيكي

يبيعوا اللون يغشوا الدم
يهدوا الكون
يشيلوا الكيف في عب الكم
أنا أنفاسك الخضرا
وانا الجرح اللي في جبينك
أنا الخنجر في شريانك
وأنا اللقمة في أيد طفلك 
أنا قبرك وأكفانك
وأنا الشمعايا في حفلك 
أنا الجاهل .. لكن بقرا 
وبافهم غاية النظرة
أنا دارك وأنا أهلك وأنا وردك وأنا نسلك 
أنا رغيفك وفرانة وحطب النار 
وزيتونك وزتانة 
أنا القاطف وأنا العصار
وإسلامك وقرآنة
وقلبي منشد الأذكار
أنا العابد
أنا الزاهد
أنا اللي يحب مايلومنيش
أنا العاشق .. أنا الدرويش 

صلاة الثورة ما تفتنيش 
ودم شهيدي وضآني بماء تاني
بماء من نبع نوراني
في قلبي ما فيش في أسراري ولا حكايتي - إلا أنتي 
يا خيط النور
يا كوة في سور
يا نور منظور
يا خير محظور
أنا الأيد اللي منعاني 
أنا الآسر .. وأنا المأسور
أنا الغايب
أنا الدايب - صبابة - والجناح مكسور
وأنا التايب عن الماء الحرام والعيش 

أنا الدرويش .. أبو الدراويش
جناحات قلبي من غير ريش
أنا الماشي وأنتي الفكر
أنا المجنون في قلب الذكر
ومحتكر المحبة البكر
سكنتي ازاي كدة في عيشي 
ونخششتي في نخاشيشي 
كأنك فيا مولودة وموجودة
ومفقود حب مفقودة 
وأغانيكي أنا هيه 
على صدري غيطان زعتر و" ميرامية "
ميرامية على صدري
ويوم ما أموت تحشها وترميها على قبري
أنا المنقوش في كفينك
يا موشومة على صدري
يا كبشة عطر ريحاني 
يا صوت دمي إذا يسري
ولا يفصلنا يوم فاصل 
ودة الحاصل 
فماتلومينيش
دا أنا الدرويش
أنا المقتول .. أنا المهبول 
أنا اللي بادروش الدراويش
 بافرق جرحي ع الثوار
وأكفن ميتي بنوار
وفي صفوفك تلاقيني أفرق عيش
ماتحرقشي عبايتي النار ولا اللحية 
ومن حارة إلى حارة 
ومن شارع إلى شارع
ومن ناحية إلى ناحية 
يقابلني العدو برصاص
أقوم نافضة من الجبة الرصاص وارمية كأنة قش
قلوب الاوليا نيتها لا تتغش
أنا الدرويش .. ما ينقصنيش فدا وإخلاص 
والرجعة ما تنفعنيش

صورتها تطل م الطاقة 
عيونها السودا عشاقة ومشتاقة 
وأنا الدرويش بنزف دم 
وسع لي الطريق يا عم 
وماشي بجرحي مش مهتم
يا عرسي يا انتفا موتي
حبيبتي ساكنة في صوتي
وماسك ايدها في السكة 
تسابق خطوتي ضحكة 
ولون الدم في صدري ما سكتنيش
وخلاني أعيش وأعيش 
أعيش درويش يا درويشة
يا درويشة وأموت درويش
أعيش درويش
وأمشي أدروش الدراويش 
وأغني أدروش الدراويش
وأموت بادروش الدراويش
حبيبتي تعيش
حبيبتي تعيش 
حبيبتي تعيش 

0 التعليقات

إرسال تعليق

رافعين معنوياتي . رأيك يهمني . ردك يسعدني .