| 0 التعليقات ]






البت باتعه... بنت زيد عبد الصبور
اللي أمها يوم عرسها
كان عفشها... حلّة وبابور
ومعاه كمان صندوق خشب
كان أصله سحارة صابون
فيه بنستين والمكحلة
ومراية والفلاية والملقاط
وحجر وليفة ومبخره
وقزازة كان فيها البخور
وجوز صحون
ومنٍخُلين..
والطشت والقروانه والغربال..
ومقشّه ليف...
ومقشتين عرجون
وزير وزلعة وقلتين وماجور
وحصيره من سوق التلات
ولحاف بإيدها منجداه
ومخدتين
والوش كان دمُّور



في الانفتاح
علي رأي صاحبي والانبطاح
وفتحنا مصر سداح مداح


والعرض أصبح مستباح
ونسينا حي علي الكفاح
اتلخبطت كل الأمور
وقيم كتير
وعادات كتير اتغيرت
من ضمنها غًلو المهور



البنت دي
بنت أم باتعه
مش عاجبه حد في مشيها
إكمنًّها.. مشيت طريقها لوحدها
والأسرة غابت عنًّها
مشغولة عنها بعبئها
سايبينها هيًّ وشأنها
وإكمنًّها مستهدفه
الأجنبي ومعاه غبي
فكّر لها



قال أولا:
ترفض معيشة أهلها
ترفض أوامر ربها
ترمي الحياء والانتماء ورا ضهرها
تقطع جدورها بنفسها
أوعز لها
إزاي حتعرض لحمها
وتبان مفاتن جسمها
من ضفرها.. لأعلي شعرة في شعرها



عمل الصالات... تعرض موضات
والاعلانات... ماليه الشاشات
بالشنبوهات والتسريحات
وحاجات كتير فرحت بها
تاهت ونسيت نفسها
وتكلًّمك ربع الكلام بالأجنبي
وتقول هالو...
بنت أم باتعه تقول هالو
مرسيه يا شوشو وثانك يو
وكَمٍ يا توتو وياللا جو

وبكرة بينا راندفو


وكبار شيوخ المسلمين
ما عرفش ليه مًتلجًّمين
والمسئولين... فتحوا الببان علي وًسعها
قام قال سلامة ألمًّها
يمكن تغيّر فكرها
وتعيش حياتها بحلوها وبمرها
راح لـ أمها...
يخطبها منها وقال لها
بصراحه بنتك..
عاوزه حد يلمّها
وأنا قدّها



قالت: وماله
البنت يلزمها الجواز
شخشخ جيوبك.. واشتري يلا الجهاز
قال: اطلبي...
قالت: تجهز شقه.. قد أربع إوض
أحسن نابوليا في البلد
وتجيبها من دمياط
وتجيب نجف من غير عدد
والمكنسة بشفاط
والدِش قبل الدٌش
والفيديو والبوتاجاز
وتجيب لها تلاجة ستاشر قدم
وتجيب لها قبل الجواز...
الشنطة والمحمول
وتجيب لها غسالة فول
أنا قصدي فول توماتيك
شقتها كاملة..
زي أي بوتيك
وتجيب لها قبل الجهاز
الشبكة طقم من الدهب
أنا مش حاقول ألماظ
وتجيب لها فستان زفاف
من غير كمام من غير كتاف
علشان يبين صدرها
وتبان مفاتن جسمها
وتجيب غوازي تزفها
واللي اسمه إيه شهر العسل
في الشرم والا الغردقة
وبلاش أمور البعزقة
آدي مطلبي


إن كنت قادر مهرها
قرَّب لها
أنا مش حاميّل بختها..



قال: يا ام باتعه حاجيب منين
أنا لاني راجل مرتشي
ولا أحب أجيب بالدّين
ولا أرضي بالتقسيط..
الطاق بيبقي طاقين
ويكتّبوني شيكات
أو أمضي علي ايصالات
علي إنها امانات
وحكاية مش هيّ
لو بس فات شهرين
مادفعتلوش قسطين
بدل المحامي اتنين
حايجيب له رفض الشيك
ومصيبه وقضيه
ومش حاقولك عالقرف
وحاجات مخلًّه بالشرف
اما البوليس والمحكمه
حابقي في نظرهم منحرف
وباكسر القوانين
شوفي يا ام باتعه
أنا عندي شقه محندقه
معقوله ماهش ضيقه
فيها يادوب أوضتين
وعملت جمعيه
مع ناس أماره زيكم
وقبضتها ألفين
وادي اللي عندي وقلتلك بصراحه
وبإذن واحد أحد
ربًّك حايفرجها..
وباتعه حتريَّحك.. وتعيشي مرتاحه



قالت له: قم من هنا
قم فضها سيره
أنا احترمتك.. عشان الأهل والجيره
بتقولي الفين جنيه?!!


الفين جنية دول اية ؟!!
وانا اللي قال بافتكر..
باتعه حاتخد بيه
حافظ علي كلمتك يا اهبل..
وخلًّيك زوق
دي باتعه طول عمرها
دايما تبص لفوق
الاحمر والاخضر
وشي محزَّق وبنطلونات
والشعر فوق كتفها سايح
وفي الكوافير
مش كل طير يندبح
خد دش وانت تفوق
وتفوق لنفسك
وتتكلم كلام موزون
وفرضنا انت اللي عاقل
والمستمع مجنون !
ألفين جنيه للغوازي والا للمأذون?!! 
فيه ناس كتير زيكم مش عايشة في الدنيا.
مابتسمعوش الرداوي.. والا التلفزيون?!!
شفت اللي بيقدمه الحاج متولي?!!
الشقه بالعفش كامله..
وفلوس كتير في البنك
كتبه لعروسته..
دَا غير اللبس والمصاريف
شايفاه بعيني
ولا واحد غريب قالًّلي
كل المسلسل تابعته دقيقه بدقيقه
والحاج متولي إلاهي لم يشوف ضيقه
راجل صحيح مًقٍتًدًر
كل البنات عاوزاه
وباتعه بنتي..
إلاهي يكون نصيبها معاه
مش جاي تقولي الشباب !!
أنا ناقصه هَمٍ تقيل



قال: يا ام باتعه اسمعيني
كل دا تمثيل
قالت له: ده قصر ديل
وبلاش كلام فاضي
الشعب راضي
مافيش غيرك عامل لي تقيل
ما تكونش ماهر يا شاطر
واسم أبوك عطار
والشاي علي النار
وقاعد لسَّه عالرمله
والحلوه تيجي تلاقيك
فارش لها المنديل.?!



قال: يا ام باتعه
دي ناس بتوزع الأوهام
ساعدوا العدو بجهلهم
في الحرب عالإسلام
وأنا مش بالوم جهلهم
اللوم علي الإعلام
قالت: خلاصة الكلام
أنا بنتي مش من وقمكم
شوفولكو ناس علي قدًّكم
أنا بنتي حلوه مثقفه
حافظه الأغاني كلها.
أحدث شرايط عندها.
دي لما تلبس بنطلونها الجينز
كل الشباب تجري وتخطب ودّها
ونانسي عَجرم نفسها
ما تجيش في خصله في شعرها
ولا تيجي ضفر ف رجلها
طب والنبي...
لو شافها واحد أجنبي
ليجيب لها.
كل اللي ييجي في نفسها

انا بنتي عاوزة جدع عايق يكون كسيب
ابوه في حزب اسمة اية ويكون من المحاسيب
اوزي ابن ام بطة .. شغال على التهريب
او من بتوع النوادي ..أو يكون لعيب ..
الجون بمليون جنية ويغيظ امين الديب 

قال : يا ام باتعة اللي يرضى بالحلال هيعيش 
ما فيش بيوت تتبني بالغش والتهبيش
هيا الاغاني تداوي ام عين عورة
ولا الدول تتبني بالفن والكورة 
وياريتة فن بصحيح 
لكن ما لوش قيمة 
فن الجريمة بقى ع الشاشة والسيما
وعادات لحتى القيم 
اتقطعت أشلاء
فقد الشباب الانتماء 
بس المهم يعيش 
تايه ما بين الفراعنة .. والعرب .. وقريش
وعلموه الاستكانة لأجل اكل العيش 
وغصب عنة اتحكم بفتوة والقلاطيش 
عايزين نعيش يا ام باتعة زي خلق الله 
نحمي الشباب م الفتن 
وبلاش من المغالاه 
اللي انتي عارفاه .. حرامي 
بس مش شايفاه 
سرق عقولنا وأخلاقنا بالتلفزيون
صنع سلاسل وساحبك وانتي ماشية وراه 

قالتلة : قوم يا ابن زاهية 
يا ابن ام عين حولة 
عمال تلقح كلام 
وتعيد ثقافة السلام
هوا انت من دولا
قوم فز غور من هنا قوم غور ما تحبسناش 

بتجيب في سيرة اسمة ايه 
والفجر لسة ما جاش 
فاكر في يوم اسمة اية 
يوم احتفال اسمة اية 
ساعة ما مات اسمة اية 
وجة بدالة اسمة اية 
عمل قانون اسمة اية 
وبية مخلي اسمة اية 
باشا في أمن اسمة اية 
يقطع لسان اسمة اية 
لو جاب في سيرة اسمة اية 
عقبال سلامة ابن اية 
ويحطة في اللي اسمها اية 
تقعد سنين منحاش 
فكرك تحوش اسمة اية 
هوا اسمة اية ينحاش 

قال : يا ام باتعة انتي اية 
قصدك تخلي اسمة اية 
يحبسني في اللي اسمها اية 
من غير محاكمة اسمها اية 
اقعد سنين منحاش 
انا جبت سيرة اسمة اية 
وفرضنا قولت اسمة اية 
ما هو برضة ما غلطناش 

قالت : خلاص فوضنا .. يا تقوم تغور من هنا
انا بنتي زي القمر لسة عريسها ما جاش 
عاوزاه يكون مقتدر ويكون كبير يابلاش
انا ناقصة هم الشباب والنفخ ع الفاضي
فاكرني مكتب شئون .. هديكوا بنتي بلاش
قوم فز غور من هنا 
قوم فضها سيرة 
والباب وراك تقفلة واتهوا في ستيرة
واوعاك تهوب هنا لو ليك كرامة صحيح
وانت كنت بالشكل دا
يوم خرجتي ما تجيش

خرج يقول يا مسلمين 
يا ولاة أمور المسلمين
اللوم لمين
للمسئولين ولا الحرس 
يا مثقفين دقوا الجرس
مالة الجرس صابه الخرس
اوعاك تقولوا ان الودان صابها الصمم
اوعاك تقولوا الناس كمان زي الغنم ما بيفهموش
وبلاش تكونوا بجهلكم او حتى في ناس منكم 
بينفذوا تخطيط لبوش
فتش وشوف الجرح فين 
وضح وقول للمسئولين 
وبلاش من النوم في العسل
وبلاش كسل
ويا ريت تكونوا القدوة وتكونوا المثل 
وبلاش تعرض سمعتك للقيل وقال
وبلاش طريق الهلس والبطال
بكرة التاريخ هيغربلك
ويغربل الأعمال
في ناس تعيش .. وناس تموت ولا تتنسيش
وناس تموت تحت النعال
وفي كتب زي الدهب
وفي كتب من غير تمن يرموها للزبال
يا مثقفين فين جهدكم 
والمشكلة قدام عنيكم كلكم
قدامكوا فرصة عمركم 
راقبوا البرامج كلها 
واتفكروا واستفسروا
القصد اية من بثها 
ومين ومين م المسئولين صرح بها
وفين شيوخ المسلمين عشان توقف عرضها
واللوم لمين 
يا كبار شيوخ المسلمين
قولوا بصراحة ع الملأ 
لو واحدة تعرض لحمها 
ولا تختشيش على دمها 
ولا تحتسيش من ربها
مهرة وسايب سرعها من غير لجام
يا كبار شيوخ المسلمين عاوزين امام 
يصرخ يقول لوزارة الاعلام حرام 
وبجرأة يعلن كلمتة 
علشان يبرأ زمتة 
يعمل حساب يوم دفنتة 
يعمل حساب يوم الزحام 
قدامكوا عام 
والزحف جاي م العولمة والامريكان
وخلاص بدأ شد الحزام 
يا أيها الحكام
ما تغيبوش وعي الشعوب بالشرطة والاعلام
الكيل طفح 
وادي الشعوب بتقولكم
قدامكوا فرصة عمركم
قدامكوا عام 
يا تقولوا ع الدنيا السلام 

0 التعليقات

إرسال تعليق

رافعين معنوياتي . رأيك يهمني . ردك يسعدني .